Jer 40 | ZomZIV | STEP | Kumpi cing galkapmang Nebuzaradan in Jerusalem le Judah pana Babylon ah sal-a kikaite lakah sikkhainiang khihsa-a om Jeremiah a muh ciangin Ramah ah a khahkhia hi. Tua khitin Jeremiah tungah TOPA thu a tung hi.

Jeremiah 40

Jeremiah Kikhahkhia

1 Kumpi cing galkapmang Nebuzaradan in Jerusalem le Judah pana Babylon ah sal-a kikaite lakah sikkhainiang khihsa-a om Jeremiah a muh ciangin Ramah ah a khahkhia hi. Tua khitin Jeremiah tungah TOPA thu a tung hi. 2 Kumpicingte ukpipa in tua banga Jeremiah a om a muh ciangin a kiangah, “Nangma Pasian TOPA in hih muna dingin hih siatna a tun ding a khentatsa ahi hi. 3 Tuate tu-in TOPA in a tunsak hi a; hih dinga a gensa bang tektekin a tungsak zo hi. TOPA tungah no mite mawhin ama thu mang lo na hi manun hihte a piang ahi hi. 4 Ahi hangin tuni-in na khutdawh kikhihna sikkhainiang panin kong khakkhia hi. Na ut leh Babylon ah kei hong zui inla nang kong kem ding hi; nong zuih nop kei leh, hong zui kei in. En in, na mai-ah gambuppi a om hi. Na utna peuhah pai in,” a ci hi. 5 Jeremiah in a pai ^{▼▼40.5 Ahikeh Jeremiah in a dawng hi} nading mun a khentel ma-in Nebuzaradan in a pau zomlai-a, “Babylon kumpipa in Judah khuapite uk dinga a koih Shaphan tapa, Ahikam tapa Gedaliah kiangah kileh kik inla mite lakah amah tawh tengkhawm in; ahikeh na utna mun peuhpeuh ah pai in,” a ci hi.

Tua ciangin galkap mangpa in a nek ding guanin letsong khat pia-a a paisak hi. 6 Tua ciangin Mizpah a Ahikam tapa Gedaliah kiangah Jeremiah pai-a amah tawh gam sunga kinusia mite lakah a tengkhawm uh hi.

Gedaliah Kimuansuam

7 Gam sunga a omlai galkap mangte le a mite un, Babylon kumpipa in Ahikam tapa Gedaliah, tua gam ukpipa ding le tua gam sunga a zawng penpen, Babylon ah sal-a kikai lo nupi, papi, numei naupangte uk dingin a koih lam a theih uh ciangin 8 Mizpah a Gedaliah kiangah - Nathaniah tapa Ishmael, Kareah tapate Johanan le Jonathan, Tanhumeth tapa Netopath-te Ephai tapa Seraiah, le Maacath mite tapa Jaazaniah ^{▼▼40.8 Hebrew in Jezaniah, Jaazaniah tawh kilamdang lo} le a mite uh a va pai uh hi. 9 Shaphan tapa Ahikam tapa Gedaliah in tua mite le ama mite khamuanin a kiciam hi. Amah in, “Babylon mite ^{▼▼40.9 Ahikeh Chaldea-te tg.10 ah zong} nasem suah ding lau kei un. Gam sungah teng unla Babylon kumpipa na sem le uhcin no adingin hong hoih na ding hi. 10 Kei ka hileh eite kianga hong pai Babylon mite mai-ah no tanga ding dingin Mizpah ah ka teng ding hi; ahi hangin note in zu, khuakhal singgah le sathaute kaikhawm unla na beelpi sung uhah kholin na laksa uh khuapite ah teng un,” a ci hi.

11 Moab, Ammon, Edom le gamdanga om Jew-te khempeuh in Babylon kumpipa in Judah ah a baanglai nusiat nei-a amaute uk dingin Shaphan tapa Ahikam tapa Gedaliah ukpi-in koih hi cih thu a zak uh ciangin, 12 amaute a kithehthangna uh gam khempeuh panin Judah gam Mizpah a Gedaliah kiangah a kileh kik uh hi. Tuateh zu le khuakhal singgah tampitak a kaikhawm uh hi. ^d

13 Kareah tapa Johanan le gam sunga om lai a galkap mangte khempeuh Mizpah a Gedaliah kiangah pai uh a, 14 ama kiangah, “Ammon-te kumpipa Baalis in Nethaniah tapa Ishmael nang that dinga hong sawl lam thei lo na hi hiam?” a ci uh hi. Ahi hangin Ahikam tapa Gedaliah in amaute thugen a um kei hi. ^e

15 Tua ciangin Kareah tapa Johanan in Mizpah a om Gedaliah, amah kia a om laitakin hopih a, “Pai-in Nethaniah tapa Ishmael hong thatsak in, kuamah in hong thei lo ding hi. Bang hangin amah in nang hong thatin nang hong beel na kim na pama om Jew-te khempeuh kithehthangsakin Judah a, a baanglaite mangthangsak ding ahi hiam?” a ci hi. ^f

16 Ahi hangin Ahikam tapa Gedaliah in, Kareah tapa Johanan kiangah, “Tua bangin hih kei in’ Ishmael thu na genna man lo hi,” a ci hi.